حساب بنكي بالدولار

بتعتمد علي الانترنت كمصدر دخل ؟؟ إذاً لازمك حساب بنكي بالدولار.

(تجربة كاملة)
---
طبعاً اي حد شغال علي الانترنت بشكل او بأخر هيكون محتاج حساب بنكي سواء شغال ادسنس او افيليت او فري لانسر او اي مجال اخر علي الانترنت .. ونظراً لعك البنوك المصرية وقرفها فا ده بيحطنا في عقبات كتير في فتح الحسابات والتعاملات البنكية بوجه عام .. ولكن لي تجربة سلسة وناجحه مع احدي الحسابات البنكية هشاركها معاكم للأفادة.
أولا انا ليه هحتاج حساب بنكي بالدولار ؟
لو انت شغال علي ادسنس سواء مواقع او عندك قناة يوتيوب اكيد هتفضل انك تحط حسابك البنكي في حساب ادسنس ويتحول عليه ارباحك بالدولار وتقدر تستلمها بالدولار من غير مشاوير ولا زحمه وسترن.
لو بتتعامل مع شركات اعلانات غير ادسنس فمعظمها بتقبل الدفع عبر تحويل بنكي
لو مشترك في قناتك بشبكة بارتنر فأكيد هتحتاج حساب بنكي
لو بتتعامل مع اي بنوك الكترونية زي بايونير وسكريل وبايزا وغيرهم وغيرهم هتبقي محتاج بردو حساب بنكي تحول فلوسك عليه.
لو شغال افليت في سوق وجوميا مثلا فالاتنين وسيلة الدفع المتاحة هي الحساب البنكي.
لو عايز تهج من البلد وجيت تقدم علي اي فيزا لاي دولة سواء فيزا شنجن او امريكا
فأول حاجة هتطلب منك كشف الحساب البنكي ويا سلام لو حسابك بالدولار ومعدي الـ 4000 دولار اعتبر فيزتك اتقبلت.
---
طيب من غير لك كتير ندخل في التجربة
تجربتنا علي (بنك مصر) ممكن الناس تستغرب ان ازاي التجربة علي بنك مصري مش بنك استثماري عالمي مثلا كل اللي جاي بعد كده مبررات لكده.
بعد عناء واكتر من سنة لف ع البنوك اخيراً فتحت حساب في (بنك مصر) 
كان السبب الاساسي لفتح الحساب في بنك مصر تحديداً ان هو البنك الوحيد المتاح في مصر يفتحلك حساب بنكي بالدولار بدون اثبات دخل فقط بالبطاقة الشخصية.
كل اللي انت هتعمله انك هتاخد في ايدك ورقة بـ 100 دولار امريكي وبطاقتك الشخصية بدون اثبات دخل او ظيفة اوي اي شئ وتطلع علي اقرب فرع لـ (بنك مصر) قريب منك وطبعاً بنك مصر اكبر شبكة فروع في مصر بأكتر من 600 فرع يعني من الاخر مفيش مكان في مصر مش هيكون متاح فيه فرع لبنك مصر.
هتعمل ايه بقي هتدخل بالـ 100 دولار والبطاقة وتاخد رقم لخدمة العملاء وتطلب من الموظف المختص انه يفتحلك (حساب جاري بالدولار) ركز حساب جاري.
ليه بقي حساب جاري؟
لعدة اسباب اولها ان حساب التوفير لازم يطلعله دفتر وعشان تعمل اي معاملات سحب او ايداع لازم يكون معاك الدفتر فده حوار رخم كمان المصيبة التانية انك مش هتعرف تسحب فلوسك اللي في حساب التوفير ده الا من الفرع اللي عملت منه الحساب ده غير ان الدفتر اول ما بتعمل الحساب بياخد وقت علي ما يطلعلك ممكن يوصل لشهرين شهرين ونص وطبعاً في الفترة دي متقدرش تسحب اي فلوس من الحساب.
انما الحساب الجاري بيتيح ليك السحب وعمل جميع المعملات المالية ع الحساب من اي فرع لبنك مصر في اي حته وبالنسبة للفروع (الحته دي مهمة) بنك مصر اكبر بنك مصري ليه تواجد في الخارج بشبكة فروع جبارة برة مصر.
تواجد بشكل كامل في لبنان بأكثر من 33 فرع
تواجد بشكل كامل في الامارات بأكثر من 8 فروع في 8 امارات مختلفة.
تواجد في السعودية بـ 4 فروع واكتر من 50 مراسل (مراسلين البنك) هما بنوك موقعه بروتوكول تعاون مع بنك مصر لتمثيل البنك في فروعهم يعني كل بنك من مراسلين بنك مصر دول في في فروعهم مكتب بموظف لخدمة عملاء بنك مصر.
4 فروع في اروربا: فرع انجلترا فرع ميونخ في المانيا فرع في اسبانيا وأول فرع للبنك في اوروبا في باريس
ومكتب تمثيل مكبر في روسيا.
وايضا مكتب تمثيل مكبر في الصين.
ده غير شبكة المراسلين المتواجدين في اكتر من 133 دولة حول العالم منهم دول اوربا واسيا وامريكا الجنوبية والشمالية 
الكلام ده هيفيدنا بأيه الكلام ده هيفيدك انك مستقبلا لو سافرت برة هتقدر تدير معاملاتك البنكية علي الحساب من اي دولة هتسافرها ودي طبعاً ميزة عظيمة.
خدمة الـ (online banking) لمتابعة حسابك لحظة بلحظة علي موقع البنك علي الانترنت تقدر تشوف رصيد حسابك واي تحويلات تمت للحساب في لحظتها وتفاصيل العمليات دي.
امكانية اصدار دفتر شيكات لمالك الحساب الجاري
عدم وجود حد ادني للحساب الجاري للسحب والايداع يعني ممكن تدخل ع البنك في لحظة تسحب كل رصيد الحساب وتسيبه ع الصفر.
مصاريف سنوية في رأيي تافهة جداً فقط 6 دولار في السنة ولو رصيد حسابك تعدي الـ 2000 دولار هتاخد فايدة 2.5% وطبعاً دول يغطو مصاريف الحساب السنوية ويطلعو مكسب.
مصاريف فتح الحساب 55 جنية شامله كل حاجة.
---
تم تجربة الحساب في السحب والتحويل من الخدمات التالية:
جوجل ادسنس 
بايونير
سوق دوت كوم 
بايزا 
سكريل
شركتين بارتنر يوتيوب
والعمولة كالأتي: نتكلم علي حوالات ادسنس لان منها هتعرف عمولة بنك مصر لان ادسنس ملوش عمولة لكن البنوك الالكترونية بتاخد عمولة علي التحويل ومش هنعرف نحسب بنك مصر بياخد كام والبنك الالكتروني بياخد كام .. اكتر من سحبه علي ادسنس كنت ساحب مرة 2500 دولار اخد 21 دولار عمولة .. احسبها بقي شوف العمولة كام
دي تجربة تحويلاتي الشخصية مع الحساب وطبعاً الحساب يقبل التحويل من اي مكان في العالم.
دي فوائد فتح الحساب ده غير طبعاً الفوائد التقليدية اللي هي ادخار الاموال في مكان آمن وانك تبعد الفلوس عن ايدك عشان تمسك نفسك في المصاريف شويه